Sidheekh Subair എനിക്കെന്താണ്

Views:


എനിക്കെന്താണ്

കറമൂടി ഇരുളാണ്ട്,
വഴിയൊന്നും തിരിയാണ്ട്,
പെരുംപാത മണത്തെങ്ങോ
കുടുങ്ങണുണ്ട്...

വിജയത്തിൻ മദം പൂണ്ട-
ങ്ങലറുന്നൊരെതിരാളി
പെരും ചോദ്യമുനകൊണ്ട്
പിളർക്കണുണ്ട്...

കലക്കങ്ങൾ അടക്കുവാൻ 
അലമാലയൊടുക്കുവാൻ
അവനുണ്ട്, ചിന്തമാന്തി
വിത്തുകൾ പാകി...

കലപില കനവുകൾ 
പറക്കുവാൻ കൊതി മൂത്ത് ,
ചിറകില്ലാ കിളികൾപോൽ 
പകച്ചു നീറി...

നോക്കുടക്കാ ഗഗനത്തിൽ
പാട്ടു മൂളാക്കാറ്റു കെട്ടി
ചിരകാലം തപിച്ചങ്ങ് തപസ്സിലാഴ്ന്നു...

അകക്കണ്ണിൻ വെളിച്ചത്തിൽ 
ഒളിപ്പിച്ച കദനങ്ങൾ
കരൾ വെന്ത് മനം ചൂഴ്ന്ന്
ജപിച്ചുണർത്തി...

മഴ ചീണ്ടി തുറക്കവേ,
പുതുമണം പരക്കവേ,
കരളലക്കടലിലി-
ന്നറിവിടങ്ങൾ...

അനുഭവ നനയേറ്റ്, 
കനിവായിവിളഞ്ഞിട്ട്,
അതിരുകൾ താണ്ടുവോർ-
ക്കന്നമാകേണം...

ഇരുളിൽ നിന്നുയർന്നല്ലോ,
പുതുയാത്ര തുടരുന്നു, 
വിഴുങ്ങുവാൻ ഇരയില്ലേൽ,
എനിക്കെന്താണ്...





No comments: