26 August 2019

K V Rajasekharan :: ലേഖനം :: കോൺഗ്രസ്സ്: 'വഞ്ചി തിരുനക്കരെത്തന്നെ'




സോണിയ വീണ്ടും കോൺഗ്രസ്സ് അദ്ധ്യക്ഷ!  'വഞ്ചി തിരുനക്കരെത്തന്നെ'! അവിടെ കിടക്കട്ടെ.  ഏലിച്ചേടത്തിയുടെ കഥയൊന്നു കേട്ടിട്ട് നോക്കാം വഞ്ചി ഇനിയും അനങ്ങുമോയെന്ന്.

ഏലി ഒരു കോലമാകും  വരെ ആരെയും താക്കോൽ ഏൽപ്പിച്ചില്ല. ഏലിയുടെ അമ്മായിയമ്മയുടെ മൂക്കും മുഷ്കും നാക്കും നോട്ടവും ഉള്ള മോളെ ഏൽപ്പിക്കുമെന്നു നോക്കിയിരിപ്പായിരുന്നു ഇടവകക്കാരെല്ലാം.  അടിച്ചു പൊളിക്കാനുള്ള അവരുടെ മോഹം! ഏലിയുടെ പേടി അതല്ലായിരുന്നു. മോടെ കെട്ടിയോൻ ആളു പിശകാണ്. ആർത്തി പെരുത്തവനാണ്, കമിഴ്ന്നു വീണാൽ കാൽപണം കൊണ്ടേ പൊങ്ങൂയെന്നാണ് നാട്ടുകാർ പറയുന്നത്.  അതല്ല പ്രശ്നം, അതിൽ ഏലിക്കൂ പരാതിയുമില്ല. മരുമകന്റെ അപ്പനും അനിയനും എങ്ങനെയാ ചത്തതെന്ന് ആളുകൾ പലതും പറയുന്നു. അത് ഓർക്കുമ്പോൾ ഉള്ളിൽ ഒടുങ്ങാത്ത പേടി.

 മറ്റൊന്ന് മോനാണ്.    അവിടെയും പ്രശ്നം! . അവൻ എങ്ങനെ പോകുന്നു, എതിലേ പോകുന്നു, പുറത്തു പറയാൻ കൊള്ളില്ല. നാലാളറിഞ്ഞ് കെട്ടിയിട്ടില്ല. കാണിക്കാനൊരൂ കെട്ടിയോളുമില്ല.  കാണാമറയത്ത് കണ്ണെത്താദൂരത്ത് ചുറ്റിക്കളിയാണ് പണി എന്നത് അറിയാനിനി ആരും ബാക്കിയില്ല. കൂടുതൽ ആലോചിച്ചിട്ടു കാര്യമില്ല. ഇനി അവനാകട്ടെ കുടുംബം നടത്തുന്നതെന്ന് ഏലി രണ്ടും കൽപ്പിച്ചു തീരുമാനിച്ചു.

എന്തായാലും കാര്യമായ പണിയൊന്നും ബാക്കിയില്ലാ എന്നതായിരുന്നു സമാധാനം.  ചാകാൻ നേരം നോക്കി കിടക്കുന്ന വല്ല്യപ്പനേ കുഴിയിലേക്കെടുക്കുന്ന പണി നടത്തണം..  ഏലി നോക്കിയിട്ടിതുവരെ നടക്കാത്ത കാര്യമാണ്! മോനത് സാധിക്കുമെന്ന തോന്നലുണ്ടായിരുന്നു.  കുറ്റം പറയരുതല്ലോ അടുത്ത് എത്തിയപ്പോഴൊക്കെ മുട്ടിയും തട്ടിയും പട്ടിണിക്കിട്ടും അവനും ശ്രമിച്ചു.  പക്ഷേ എന്തു ചെയ്യാൻ! പണ്ട് ഉണ്ടത് പാഴല്ലാതിരുന്നതുകൊണ്ട് കിളവൻ ചത്തുമില്ല, കട്ടിലൊഴിഞ്ഞതുമില്ല.

പക്ഷേ മോനാരാ മോൻ!  വല്ല്യപ്പന് ഇനി കാലം ഏറെയില്ലായെന്ന് അവനുറപ്പാക്കി.  ഇനി അന്ത്യക്കൂദാശ കൊടുക്കാൻ അച്ചനെ വിളിച്ചാൽ മതിയെന്ന നിലയിലവൻ എത്തിച്ചൂ. അവിടെയാണു പ്രശ്നം!  ആരുവേണമെങ്കിലും ആയിക്കൊള്ളൂ എനിക്കിനി ഈ പണി പറ്റില്ലായെന്ന് അവൻ തീർത്തു പറഞ്ഞു. അവനെ കുറ്റം പറയാനും പറ്റില്ല.  ചുറ്റിക്കളിച്ചു നടന്ന ചെറുക്കനല്ലേ? എത്ര കാലം ഇങ്ങനെ വല്ല്യപ്പനേം നോക്കി ഇരിക്കാനാകും? തന്നെയല്ല. കിളവൻ തട്ടിപ്പോയാൽ കാലപ്പഴക്കം കൊണ്ടും കയ്യിലിരുപ്പുകൊണ്ടും ആണെന്നാണ് പൊതുധാരണയെങ്കിലും അതിൽ  ചെറുക്കന്‍റെ കൈക്രിയയും ഉണ്ടെന്ന് അറിയാവുന്നവരാരെങ്കിലും പോസ്റ്റുമാർട്ടം വേണമെന്നായാൽ ചെറുക്കന്‍ കുടുങ്ങും. 

ഇട്ടിട്ടു പോകും വഴി അവൻ  പറഞ്ഞ് കൃത്യം: "മരണം കാത്തു കിടക്കുന്ന കിളവന്റെ അന്ത്യക്കൂദാശ കൂടി  ചെയ്യിക്കാൻ എന്നെ കിട്ടില്ല. എന്റെ പുറകെ ആരും വിളിച്ചു കൂവി വരുകയും വേണ്ട.  ആരു വേണേൽ ചെയ്തോ. പക്ഷേ ആ പണി എന്റെ അമ്മയേം പെങ്ങളേം ഏൽപ്പിക്കരുത്".

അവൻ ഉള്ള കാര്യമാ  പറഞ്ഞത്. പക്ഷേ ഇടവകക്കാർ പിന്നേം പുറകെ!  അവൻ തന്നെ വേണമെന്നാണ് വലിയ വായിൽ നിലവിളിക്കുന്നത്.  പക്ഷേ യഥാർത്ഥത്തിൽ മോളെയാണ് അവന്മാർക്കു വേണ്ടത്. ചില അവന്മാരൊക്കെ അങ്ങനെ തന്നെ  പറയുന്നുമുണ്ട്. അതുപിന്നെ അങ്ങനെയല്ലേ വരൂ. അവളാകുന്നതല്ലേ അവന്മാർക്കും ഒരിത്. മോനത് അറിഞ്ഞുകൊണ്ടു തന്നെയാണ് അവളെ  പോയിട്ട് എന്നെ പോലും ആ പണി ഏൽപ്പിക്കരുതെന്ന് പ്രത്യേകം പറഞ്ഞത്.

പകരം ആരാണെന്ന ചോദിച്ചപ്പഴേ ഞാൻ അടുക്കളയിലും തോട്ടത്തിലും തൊടിയിലും പണിയെടുക്കുന്ന പറഞ്ഞാൽ കേക്കുന്ന, തിരിച്ചു പറയാത്ത, വിശ്വസിക്കാൻ കൊള്ളാവുന്ന, വേലക്കാരെ ആരെയെങ്കിലും ആകാമെന്നു പറഞ്ഞതാണ്.  പക്ഷേ ഇടവകയിൽ പലർക്കും എതിർപ്പ്. തടിയുള്ളവരും മിടുക്കുള്ളവരും പ്രായം കുറഞ്ഞവരും വേറെയുണ്ടുപോലും! അവനെയൊക്കെ താക്കോൽ ഏൽപ്പിച്ചാൽ ചെറുക്കനെന്നെങ്കിലും തിരിച്ചുവരുമ്പോൾ എന്നായെടുത്ത് കൊടുക്കും?

വേല കയ്യിലിരിക്കട്ടെ,  ഏലി ഇനം വേറെയാണ്. തത്കാലം  ഏലി ആ താക്കോൽ എളിയിൽ തന്നെ വെക്കുകാ!  ഇടവക കമ്മിറ്റി കൂടിയപ്പോൾ ഏലിയുടെ ഉള്ളറിഞ്ഞ് അങ്ങനെ തീരുമാനിച്ചു.   പുത്തനുടുപ്പിട്ടു വന്നവന്മാരുടെ താടിക്ക് തട്ടിയവർക്ക് ഏലി എന്നും അന്നവും കൊടുക്കും  ആശ്രയവും കൊടുക്കും. അവരെ ആ വഴിയിലെത്തിച്ച അന്തോണിച്ചേട്ടൻ കമ്മറ്റിയിൽ എന്നുമുണ്ടാകുമെന്ന് ഏലിയുടെ ഉറപ്പുമുണ്ട്.

ഇനി കോൺഗ്രസ്സ് വഞ്ചിയിലേക്കാകാം നോട്ടം.  2019ലെ തെരഞ്ഞെടുപ്പിൽ തോറ്റു തകർന്ന കോൺഗ്രസ്സിന്  രാഹുൽ ഏറ്റവും നല്ല ഒരവസരമാണ് നൽകിയത്. ഇൻഡ്യൻ ജനാധിപത്യത്തിന്റെ  ശോഭനമായ ഭാവി ഉറപ്പാക്കുവാൻ ഇൻഡ്യൻ നാഷണൽ കോൺഗ്രസ്സിന് ശ്രമിച്ചു നോക്കാവുന്നതാണ്. ഒരു വെല്ലുവിളി നിലവിലുണ്ട്. ഒരു സാദ്ധ്യത ഒളിഞ്ഞിരിക്കുന്നുമുണ്ട്.

പാർട്ടിയുടെ തലപ്പത്ത് നിന്നും സോണിയ കുടുംബം മാറണം.  ഗ്രാമഗ്രാമാന്തരങ്ങളിൽ നിന്ന് പ്രവർത്തകർ വളർന്നുവന്ന് ദേശീയതലത്തിലും സ്വാഭാവിക നേതൃത്വം വളർന്നു വരണം.  അതൊരു പുതിയ രാഷ്ട്രീയ സംസ്കാരത്തിന് ഇടവരുത്തണം. മറ്റു പാര്‍ട്ടികൾക്കും മാതൃകയാകണം. അങ്ങനെ സംഭവിച്ചാൽ  ഭാരതത്തിനു നല്ലത്, ജനാധിപത്യത്തിന്റെ നല്ലത്, ലോകത്തിനും നല്ലത്.

അങ്ങനെ ഒരു രാഷ്ട്രീയ മാറ്റം ഉണ്ടാകാൻ സോണിയയെയോ രാഹുലിനെയോ പ്രിയങ്കയയെയോ രാഷ്ട്രീയ തട്ടകത്തിനു പുറത്താക്കേണ്ടതുമില്ല.  അവർക്കും സക്രിയമായി തുടരാം. ലോകസഭാ അംഗത്വം ഉൾപ്പെടെ എല്ലാ പദവികളിൽ നിന്നും മാറി നിൽക്കുക. അനധികൃതമായി കയ്യിലെത്തിയ മുഴുവൻ സമ്പാദ്യവും പാർട്ടിക്കും സമാജത്തിനും രാജ്യത്തിനുമായി സമർപ്പിക്കുക.  തങ്ങൾക്ക് എതിരെയുള്ള കേസുകളിൽ നാഷണൽ ഹെറാൾഡു പോലെ തെറ്റു ചെയ്തിട്ടുള്ള കേസുകളിൽ കുറ്റം ഏറ്റു പറഞ്ഞ് പെട്ടെന്നു തീർപ്പാക്കുവാൻ നോക്കുക. മറ്റുള്ളവയിൽ പ്രതിരോധിക്കണമെങ്കിൽ അങ്ങനെയാകാം.

കഴിഞ്ഞില്ല.  സർക്കാർ ബംഗ്ളാവുകൾ ഒഴിയുക.  അദ്ധ്വാനിച്ചുണ്ടാക്കിയതോ അവകാശമായി കിട്ടിയതോ ആയ പണം കൊടുത്ത് വീടു  വാങ്ങി അമ്മയും മകനും മകളും താമസം അങ്ങോട്ട് മാറ്റുക. കൂടെ താമസിക്കേണ്ടവരാരെങ്കിൽ നാലാളറിഞ്ഞ് കൂടെ താമസിപ്പിക്കുക.  ബിനീഷ് കോടിയേരിയുടെ ഗതി വരാതിരിക്കും. ഇടയ്ക്കിടെ ആരോടും പറയാതെ വിദേശത്തേക്ക് പോകുന്നതും ഒഴിവാക്കാം.

ധൈര്യമുണ്ടെങ്കിൽ ഇത്രയൊക്കെ ചെയ്താൽ പുതിയ ഒരൂ ജീവിതം നിങ്ങളെ കാത്തിരിക്കും.  ഇത്രയൊക്കെ ചെയ്താലും അവരെ വീണ്ടും വേട്ടയാടാനും മാത്രം കല്ലു പോലെയുള്ള മനസ്സല്ല നരേന്ദ്ര മോദിക്കും കൂടെയുള്ളവർക്കും ഉള്ളത്.  തെറ്റ് തിരുത്തിയാലും തെരുവിലിറക്കുന്നതല്ല ഭാരതത്തിന്റെ സംസ്കാരം.

ഇത്രയും കഴിഞ്ഞാൽ രണ്ടാം ഘട്ടമാകാം.  പേരിലെ തട്ടിപ്പ് നിർത്തുക. ഗാന്ധിയെന്ന വാല് മുറിക്കുക രാഹുലാണെങ്കിൽ അങ്ങനെ റൗൾ വിൻസിയാണെങ്കിൽ അങ്ങനെ, ഏതെങ്കിലും ഒന്നു മതി. മറ്റുപൗരത്വം പരസ്യമായി ഉപേക്ഷിക്കുക. ഒന്നിലധികം പാസ്പോർട്ടും വേണ്ട.  ഒഴിവാക്കി ലോകത്തെ അറിയിക്കുക.

ഇനിയാണ് യഥാർത്ഥ അവസരം.  മഹാത്മാ ഗാന്ധിയുടെ വഴി സ്വീകരിക്കുക.  അധികാരത്തോട് അകലം പ്രാപിച്ചുകൊണ്ട് ജനങ്ങൾക്ക് വേണ്ടി പോരാടുന്നവർക്ക് വഴികാട്ടിയാകുക, സഹയാത്രികനാകുക.  ഇരുപത്തിയൊന്നാം നൂറ്റാണ്ടിനും ഒരു മഹാത്മാവിനെ ലഭിക്കും. ഒരു രാഷ്ട്രപതിയ്ക്കൊ പ്രധാനമന്ത്രിക്കൊ എത്തിപ്പെടാൻ കഴിയുന്നതിനപ്പുറം ചരിത്രം നിങ്ങളെ എത്തിക്കും.

കഴിയുമെങ്കിൽ ശ്രമിച്ചു നോക്ക്.  അല്ലെങ്കിൽ "വഴി മാറൂ മുണ്ടയ്ക്കൽ ശേഖരാ"!


--- K V Rajasekharan

25 August 2019

Jagan :: ചെറുകിട വ്യാപാര മേഖലയിൽ പ്രവർത്തിക്കുന്നവർ "മുതലാളിമാർ" അല്ല.



സംസ്ഥാന ഖജനാവിലേക്കുള്ള വരുമാനത്തിന്റെ തൊണ്ണൂറു ശതമാനത്തോളം വരുന്ന തുക സർക്കാരിൽ നിന്നും യാതൊരു പ്രതിഫലവും വാങ്ങാതെ, എന്നാൽ, അക്ഷരാർത്ഥത്തിൽ ഭീഷണികളും പീഡനവും ഏറ്റുവാങ്ങിക്കൊണ്ടു തന്നെ, പൊതുജനങ്ങളിൽ നിന്നും വിൽപ്പന നികുതി  (ഇപ്പോൾ ജി.എസ്.ടി) ഇനത്തിൽ പിരിച്ച് നൽകുന്ന ചെറുകിട വ്യാപാരികൾക്ക് ചെറിയ ഒരാശ്വാസം പകരുന്നതായി സംസ്ഥാന മനുഷ്യാവകാശ കമ്മിഷന്റെ കഴിഞ്ഞ ദിവസത്തെ ഉത്തരവ്.

നാമമാത്രമായ കർഷക പെൻഷൻ ലഭിക്കുന്നതിന്റെ പേരിൽ വ്യാപാരി ക്ഷേമനിധിയിൽ നിന്നും ലഭിക്കുന്ന ക്ഷേമനിധി പെൻഷൻ നിഷേധിച്ച സർക്കാർ നടപടി തെറ്റെന്ന് സംസ്ഥാന മനുഷ്യാവകാശ കമ്മിഷൻ നിരീക്ഷിച്ചു. നാമമാത്ര കർഷകർ ഉപജീവനത്തിന് മറ്റൊരു തൊഴിലിലും ഏർപ്പെടരുതെന്ന് സംസ്ഥാനത്ത് നിയമം നിലവിൽ ഇല്ലെന്ന് കമ്മിഷന്റെ ഉത്തരവിൽ പറയുന്നു. നാമമാത്ര കൃഷി, ചെറുകിട വ്യാപാരം എന്നിവയിൽ നിന്ന ലഭിക്കുന്ന തുച്ഛമായ വരുമാനം ഒന്നുകൊണ്ടു മാത്രം ശരാശരി കുടുംബങ്ങൾക്ക് ജീവിക്കാനാവില്ലെന്നും ഉത്തരവിൽ ഉണ്ട്........!

ഈ ഉത്തരവ് സർക്കാരിന്റെ കണ്ണുതുറപ്പിക്കുമെന്ന് നമുക്ക് പ്രതീക്ഷിക്കാം.
വ്യാപാരി ക്ഷേമനിധിയിൽ നിന്നും തുച്ഛമായ തുക പെൻഷൻ വാങ്ങുന്ന വ്യാപാരികൾ മറ്റ ക്ഷേമ പെൻഷനുകൾ ഒന്നും തന്നെ കൈപ്പറ്റാൻ പാടില്ല എന്ന നയമാണ് സർക്കാർ സ്വീകരിച്ചിട്ടുള്ളത് ........!

ചെറുകിട വ്യാപാര മേഖലയിൽ പ്രവർത്തിക്കുന്നവർ  "മുതലാളിമാർ" അല്ല.
സർക്കാർ തൊഴിൽ നൽകാത്തതിനാൽ ഉപജീവനത്തിനായി കച്ചവടം തൊഴിൽ ആയി അവർ തെരഞ്ഞെടുത്തെന്നു മാത്രം.
കമ്മിഷന്റെ മേൽ വിവരിച്ച ഉത്തരവിൽ പറയുന്നത് പോലെ ഉപജീവനത്തിനായി ചെറുകിട വ്യാപാരം തെരഞ്ഞെടുത്തവർക്ക് കൃഷി,തയ്യൽ, കെട്ടിട നിർമ്മാണം, കശുവണ്ടി മേഖല, പശുവളർത്തൽ തുടങ്ങിയ മറ്റു തൊഴിൽ മേഖലകളിൽ കൂടി പണിയെടുത്ത് കുടുംബം പോറ്റാൻ പാടില്ല എന്ന് സംസ്ഥാനത്ത് ഒരു നിയമവും നിലനിൽക്കുന്നില്ല എന്ന് ബന്ധപ്പെട്ടവർ മനസ്സിലാക്കണം.
മറ്റൊരു തരത്തിൽ ചിന്തിച്ചാൽ ഒന്നിൽ കൂടുതൽ ചെറുകിട തൊഴിൽ മേഖലകളിൽ പ്രവർത്തിക്കാൻ തയ്യാറാകുന്നവർ സംസ്ഥാനത്തിന്റെ ഉൽപാദന മേഖലയ്ക്ക് തനേറെതായ അധിക സംഭാവന നൽകി ആ മേഖലയെ പുഷ്ടിപ്പെടുത്തുകയല്ലേ ചെയ്യുന്നത് ............?

അത്തരം വ്യക്തികളെ കണ്ടെത്തി ക്ഷേമപെൻഷൻ അയാൾ അപേക്ഷിക്കാതെ തന്നെ സ്വമേധയാ സൗജന്യമായി നൽകി പ്രോൽസാഹിപ്പിക്കുകയല്ലേ ദിശാബോധമുള്ള സർക്കാരുകൾ ചെയ്യേണ്ടത്..........?

അതിനു പകരം, കൂടുതൽ പണിയെടുക്കാൻ ഉൽസാഹം കാണിക്കുന്ന കഠിനാദ്ധ്വാനികളെ അവരുടെ ന്യായമായ ആനുകുല്യങ്ങൾ കൂടി നിഷേധിച്ച്, നിരുൽസാഹപ്പെടുത്തുന്ന തലതിരിഞ്ഞ, പിൻതിരിപ്പൻ നയം ഇനിയെങ്കിലും സർക്കാർ പുന:പരിശോധിക്കേണ്ടതാണ്.

ഇനി മറ്റൊരു വസ്തുത കൂടി നാം ഓർക്കണം.
വ്യാപാരി ക്ഷേമനിധി പെൻഷൻ, ചെറുകിട വ്യാപാരികൾക്ക് സർക്കാർ സൗജന്യമായി നൽകുന്നതല്ല...........!
ചെറുപ്പത്തിൽ  വ്യാപാര രംഗത്ത് വരുന്ന ഒരു യുവാവ് 60 വയസ്സ് ആകുന്നതു വരെ, അയാളുടെ വാർഷിക വിറ്റുവരവിന് ആനുപാതികമായിട്ടുള്ള തുക വാർഷിക വരിസംഖ്യ ആയി ക്ഷേമനിധി ബോർഡിൽ കൃത്യമായി, മുടക്കമില്ലാതെ ഒടുക്കിയാൽ മാത്രമേ, അറുപത് വയസ്സിന് ശേഷം പെൻഷൻ ലഭിക്കാനുള്ള അർഹത പോലും നേടുകയുള്ളൂ.
മിനിമം പെൻഷൻ തുക 1100 രുപ മാത്രമാണുതാനും....... !!

ഗുണഭോക്താവിൽ നിന്നും വരിസംഖ്യ വാങ്ങിയിട്ട് നിശ്ചിത കാലയളവിന് ശേഷം പെൻഷൻ ആയി മടക്കി നൽകുന്ന ഈ പദ്ധതിയെ സർക്കാർ നൽകുന്ന        'സൗജന്യ'  ക്ഷേമ പെൻഷൻ എന്ന ശ്രേണിയിൽ എങ്ങനെയാണ് പെടുത്താനാകുക........!?

ഏകദേശം, ലൈഫ് ഇൻഷുറൻസ്, പബ്ളിക് പ്രോവിഡന്റ് ഫണ്ട് മുതലായവയ്ക്ക് സമാനമായി മാത്രമേ ഇതിനെ കാണാൻ കഴിയുകയുള്ളൂ.

സർക്കാർ സൗജന്യമായി നൽകുന്ന വാർദ്ധക്യകാല പെൻഷൻ ഉൾപ്പെടെയുള്ള മറ്റു ക്ഷേമ പെൻഷൻ വാങ്ങുന്നുണ്ട് എന്ന കാരണത്താൽ മേൽ വിവരിച്ചതരത്തിൽ ലഭിക്കുന്ന വ്യാപാരി ക്ഷേമനിധി പെൻഷൻ നിഷേധിക്കാൻ പാടില്ല തന്നെ.

സംസ്ഥാന മനഷ്യാവകാശ കമ്മിഷന്റെ മേൽപ്പറഞ്ഞ ഉത്തരവിൽ ഒരു കർഷക പെൻഷൻ ഗുണഭോക്താവിന്റെ പരാതി മാത്രമാണ് പരിഗണിച്ചിട്ടുള്ളത്, പരാമർശിച്ചിട്ടുള്ളത്.

ഈ ഉത്തരവിന്റെ വെളിച്ചത്തിൽ മറ്റ് ക്ഷേമ പെൻഷനുകൾ വാങ്ങുന്ന ചെറുകിട വ്യാപാരികൾക്കു കൂടി പ്രസ്തുത ഉത്തരവിൻ പ്രകാരമുള്ള പരിരക്ഷ ലഭിക്കുന്നതിനു വേണ്ട നടപടി സർക്കാരിൽ നിന്നും ഉടൻ ഉണ്ടാകുമെന്ന് നമുക്ക് പ്രതീക്ഷിക്കാം.



കേരള വ്യാപാരി വ്യവസായി ഏകോപന സമിതിയുടെ കൊല്ലം ജില്ലാ വൈസ് പ്രസിഡന്റ് ആണ് ലേഖകൻ.

- പത്രാധിപർ

Anu P Nair :: "പുതിയ തലമുറ വായിക്കുന്നില്ല "


Photo by Nicole Honeywill on Unsplash

"ഇപ്പോഴത്തെ പിള്ളേരൊന്നും വായിക്കത്തില്ല "

"ആരാ ഇപ്പോ വായിക്കുന്നത് "
സ്ഥിരം കേൾക്കുന്ന ചില ഡയലോഗുകളാണ് .

പണ്ഡിതന്മാർ മുതൽ പാമരന്മാർ വരെ ഡയലോഗടിച്ചവരിലുണ്ട് .
ചിലർ അങ്ങനെയാണ് . അവർക്കു "ഞാൻ അല്ലേൽ എന്റെ മക്കൾ " ആയിരിക്കും ലോകം . അതിൽ നിന്നുകൊണ്ട് മാത്രമേ എന്തിനെയും പറ്റി സംസാരിക്കൂ .

വായിക്കാൻ പുതിയ തലമുറ മിനക്കെടുന്നില്ല എന്ന് അഭിപ്രായമുള്ളവരോട് രണ്ടു സംഭവങ്ങൾ പറയാം .

ഇ കഴിഞ്ഞ ജൂണിൽ പതിനെട്ടു പ്ലസ് ടു (സയൻസ് ) വിദ്യാർത്ഥികൾക്കൊപ്പം ഞാൻ ജീവിച്ചു . എന്ന് പറഞ്ഞാൽ ഊണും ഉറക്കവും ഉൾപ്പെടെ 24 മണിക്കൂറും അവർ എന്നോടൊപ്പമോ ഞാൻ അവർക്കൊപ്പമോ ഉണ്ടായിരുന്നു .
ഈ കുട്ടികൾ വർഷം 11 ലക്ഷം രൂപവരെ കൊടുത്താണ് പഠിക്കുന്നത് എന്നറിഞ്ഞാലേ അവരുടെ സാമ്പത്തിക ചുറ്റുപാട് നിങ്ങൾക്ക് ഊഹിക്കാൻ കഴിയുള്ളു .മിക്കവരും എൻ ആർ ഐ ക്കാരാണ് .

ഈ കുട്ടികൾ "ഗുരുകുലം" എന്നറിയപ്പെടുന്ന അവരുടെ ഹോസ്റ്റലിൽ എത്തുന്നത് ഒരു കെട്ടു പുസ്തകങ്ങളുമായിട്ടാണ് . പഠിക്കാനുള്ള പുസ്തകങ്ങളല്ല . വെറും ഫിക്ഷനുകൾ . ചേതൻ ഭഗത് മുതൽ പൗലോ കൊയ്‌ലോ വരെയുള്ളവരുടെ പുസ്തകങ്ങൾ . വെറുതെ കെട്ടിച്ചുമന്നു കൊണ്ടുവരലല്ല . വായിക്കുന്നുമുണ്ട് . ഞാനും അൽപ്പമൊക്കെ വായിക്കുമെന്ന് മനസ്സിലാക്കിയപ്പോൾ അവർ വായിച്ച പുസ്തകങ്ങളെക്കുറിച്ചു അഭിപ്രായങ്ങളും എന്നോട് പറഞ്ഞു . ഞായറാഴ്ചകളിൽ ഞങ്ങളൊത്തുകൂടി അവ ചർച്ച ചെയ്തു .

വർക്കലയിൽ നല്ലൊരു പുസ്തകാലയമുണ്ട് . ഇംഗ്ലീഷിലേയും മലയാളത്തിലെയും നല്ല പുസ്തകങ്ങൾ ലഭിക്കുന്ന
ക്യാപിറ്റൽ ബുക്സ് . അതിന്റെ ഉടമ എന്നോട് പറഞ്ഞു എംജിഎം സ്കൂളിലെയും ശിവഗിരി സെൻട്രൽ സ്കൂളിലെയും കുട്ടികൾ പതിവായി വന്നു പുസ്തകങ്ങൾ വാങ്ങാറുണ്ടെന്നു .

ഇനി പറ ആരാ വായിക്കത്തെ ?

  • മെഗാ സീരിയലുകൾക്കു മുൻപിൽ അടയിരിക്കുന്ന അമ്മയും മുത്തശ്ശിയും മുത്തശ്ശനുമുള്ള വീട്ടിലെ പിള്ളേർ .
  • പത്രം പോലും വായിക്കാത്ത അച്ഛന്റെ മക്കൾ .

ഈ കുട്ടികൾ വായിക്കണമെന്നു നമുക്കെങ്ങനെ വാശിപിടിക്കാനാകും ?
അവർ വായന കാണുന്നില്ലല്ലോ ?
കാണുന്നതിനെയാണ് കുട്ടികൾ അനുകരിക്കാൻ ശ്രമിക്കുക
നേരത്തെ പറഞ്ഞ സ്കൂളുകളിലെയൊക്കെ വിദ്യാർത്ഥികളുടെ അച്ഛനമ്മമാർ വിദ്യാസമ്പന്നരും തിരക്കുള്ളവരും ആണ് . അവർ മെഗാ സീരിയലുകൾ കാണില്ല. എന്നാൽ എത്ര തിരക്കിനിടയിലും വായിക്കാറുമുണ്ട് . അത് ഈ കുട്ടികൾ കാണും.
അതുകൊണ്ട് കുട്ടികൾ വായിക്കും .

നമുക്ക് വെറുതെ കുട്ടികളെ കുറ്റം പറയാനല്ലേ അറിയൂ ..!!!!
മാതൃക കാട്ടാൻ നേരമില്ലാത്ത വെറും സാധാരണക്കാരല്ലേ നമ്മൾ

--- നെല്ലിമരച്ചോട്ടില്‍

Popular Posts - Last 7 days


Malayalamasika Digest
ഓരോ ആഴ്ചയിലും പ്രസിദ്ധീകരിക്കുന്ന പുതിയ രചനകളുമായി
നിങ്ങളുടെ ഇൻബോക്സിൽ എത്തുന്നതിന്

Subscribe

* indicates required
View previous campaigns.