26 October 2019

Raji Chandrasekhar :: എന്തിനാണെന്നമ്മേ കാളീ...

Views:


എന്തിനാണെന്നമ്മേ കാളീ,
          പഴികേള്‍ക്കും പാഴ്ജന്മമാ-
യന്തംവിട്ടും ചവിട്ടേറ്റും
          കഴിയണം ഞാന്‍.

പണിക്കെല്‍പ്പില്ലാത്തോനെന്നും,
          തണുത്ത സ്വഭാവമെന്നും,
പണം കൊയ്യാനൊരുതരി
          മോഹമില്ലെന്നും,

ചൊടിയില്ല, ചുണയില്ല,
          പാട്ടുപാടാനറിയില്ല
മടിപിടിച്ചിരിപ്പാണു
          രാപകലെന്നും,

ലക്ഷങ്ങളായ് സ്വര്‍ണ്ണ വസ്ത്ര-
          ഭക്ഷണങ്ങളേകിയാലും
രക്ഷയി,ല്ലിങ്ങവര്‍ക്കെന്നും
          പരാതി മാത്രം.

മതി മതി, സഹനത്തി-
          ന്നടിക്കല്ലും പറിച്ചവ-
രതിവേഗം ഹനിക്കുവാന്‍
          കോപ്പുകൂട്ടുമ്പോള്‍

അകത്താര് പുറത്താര്
          കളിക്കാന്‍ വാ കാളി, നീയെ-
ന്നകത്താണു പുറത്താണു,
          നീയാണു ഞാനും..





No comments:

Post a Comment