06 September 2019

Raju.Kanhirangad :: കവിത :: ഇങ്ങനെ.....!

Views:

Photo by Alessio Lin on Unsplash

ഒരായുസ്സിന്റെ
ചിത്രം തുന്നിടുന്നു
ജീവിതം
കാറ്റ് ചില്ലയിൽ
പകർത്തുന്നത് പോലെ.

നാം ജീവിതത്തിലേക്ക്
നടക്കുന്നുവെന്ന് തോന്നും
ജീവിതം നമ്മിലേക്കാണ്
നടക്കുന്നതെന്ന്
തോന്നുകയേയില്ല
ബസ്സ് മുന്നിലേക്കോടുമ്പോൾ
സ്ഥലങ്ങളെല്ലാം പിന്നിലേ -
ക്കോടുന്നതുപോലെ.

ചില ജിവിതങ്ങളുണ്ട്
     കഞ്ഞിപ്പശമുക്കിയ ഖദറുപോലെ
          വടിവിൽ, വെടിപ്പിൽ
മറ്റു ചിലതുണ്ട്
     വാരിവലിച്ചിട്ടെന്നവണ്ണം
          മുഷിഞ്ഞ്, കീറി
വേറെ ചിലത്
     ഓടയിലെന്നപോലെ
          മിടുക്കില്ലാതെ മിടിപ്പു മാത്രമായി

ഒരിക്കലുണ്ട് ഗർജനവും
ഗരിമയും വിട്ട്
ഏകാന്ത ശാന്തത പുതച്ച്
തീക്കനലിലും മൗനമായ്
മൃദുല ചാരമായൊരു കിടപ്പ്.

പച്ചമരത്തിന്റെ കത്തിയെരി -
യലാണ് ജീവിതം
മൗനമാകുന്ന മണ്ണും .




No comments:

Post a Comment